Sambiang aku.

Ngelama aku udah idup ba menua ka diinjau ari nuan tu, Petara, enda kala asai sinu enggau gaga ati baka tu. Naka meh pemesai kuasa nuan Allah Taala, deka nguji siko siko mensia. Berasai puang ati maia bulih rizal kemari, tang pedis ati maia nemu sekeda bala ka chukup dikesayau aku enda bulih utai ka peneka ati.

Tang aku chukup mereti enti semua ka diberi nuan tu semina deka nguji bala sida aja, deka ngasoh bala sida ya ngering ka agi pengarap dalam nuan. Oh Petara, kami sigi nemu nuan chukup manah enggau bala kami, anak nuan :: oh Yesus Kristus, aku ngarapka nuan ulih ngintu, ngelindung ngiung bala kaban aku ka bisi penusah maia tu. Anang ngenyinu ka ati bala sida, ya Tuhan, aku balat sayau ka urang tu. Kering ka semengat sida ya ti deka maie nama nuan tu. Kasih ka kami Apai ba Serga, nadai urang lain agi ti deka nulung enti ukai nuan. Aku semina besampi dalam nama nuan.

Sinu ati endar maia nemu rizal kemari. Puji Tuhan atas utai ka diberi nuan tu. Enda nyangka aku bulih utai ka manah baka tu, taja ari mit keran amat ka nyadi lutor, ka ngubat Niang inik aku ka udah nadai. Diatu, semoa udah digenggam ba jari aku, enda sekali-kali aku deka ngelebu ka bala ti udah meri sukung ngelama tu, nyentuk ka jemah ila. Ngagai bala kaban belayan enggau bala menyadi sendi ka semampai sayau ka aku, aku enda kala ngelengka tau ka enda ngigat ka jako peransang bala kitak. Aku maju sampai ka saritu pan laban jako peransang bala kitak. Laban aku deka Niang Inik gaga ati meda ucu ya tu nyadi lutor, nitih ka peneka ati ya. Agi simpan aku jako nuan Niang Inik, dalam ati semampai bisi. Suba nuan kala madah, enti ulih nuan deka idup sampai aku graduate ari U, deka enggau meda aku ngenggam sijil MD. Tang meh, udah takdir Petara, ya lebih agi sayau ka nuan, nuan enda ulih meda aku saritu agi. Enda ngawa gak enti pia, nuan agi idup dalam pengigat aku. Selalu dalam ati, aku ngigat ka jako pesan nuan ari mit suba sampai diatu, taja nuan udah nadai agi maia aku Form 3, 6 Februari 2007.

Ngagai bala apai,bala indai, enggau sekayu rumah panjai ka endang dikenang belama ba Ulu Krian enggau Ulu Kabo ba Saratok sereta bala kaban ka ari sepiak mummy ku, aku, Nana@Nina bejanji deka maie semoa harapan bala kitak ba aku. Mintak kitak besampi ka aku ti deka bejalai jauh ngagai menoa urang enda lama agi awak ka aku enda mudah ngalah ka diri maia bisi penusah, awak ka aku mujur dalam utai ka diambik aku tu, awak ka aku enda mudah baie urang ngereja pengawa ka enda betul. Taja aku semina anak mit ka datai ari ujung dunya kelia menya, ti enda nemu reti pemansang, ngarap ka bala kitak ka tinggi agi pemandai, enda sumbung enggau aku.Ngarapka bala kitak deka malik ka aku maia tusah enggau senang. Dudi ari ila, enti aku ba endur baka bala kitak nyak, enda aku deka ngeninggi ka diri empu. Kitai sama-sama anak mensia, sama mega bisi ari besai kedirik empu.

Enti semak aku bisi ngereja penyalah tauka ngemedis ka ati sapa-sapa, ditu aku deka nusun sepuluh jari, mintak ampun meh wai. Aku anak mensia, sigi enda ulih lari ari penyalah.

*sorry for this emo note. I just can't help it. Sometimes tears just roll down my cheeks. It happens naturally*